ការ​ស្វែង​រក​ពី​របៀប​ដែល​អង្គការ​សង្គមស៊ីវិល​នៅ​កម្ពុជា​ប្រើ​បច្ចេកវិទ្យា​ថ្មី​ដើម្បី​ទំនាក់ទំនង

អត្ថបទ​នេះមានជាភាសា៖ enEnglish

Adam Fivenson

ដោយ Adam Fivenson

New Business Specialist, ICT
DAI


អង្គការ​សង្គមស៊ីវិល​ដើរ​តួ​យ៉ាង​សំខាន់​នៅ​ក្នុង​សហគមន៍​នីមួយៗ ពួក​គាត់​យល់​ពី​ឧបសគ្គ​ប្រចាំ​ថ្ងៃ​របស់​ប្រជាជន​ហើយ​ផ្ដល់​សេវាកម្ម​ដើម្បី​ដោះស្រាយ​បញ្ហា​នោះ​ភ្លាមៗ និង​ផ្ដល់​គោល​នយោបាយ​ជា​ដំណោះស្រាយ​សម្រាប់​ពេល​អនាគត។ ប្រទេស​កម្ពុជា​មាន​អង្គការ​សង្គម​ស៊ីវិល​ជា​ច្រើន ដែល​មាន​សមត្ថភាព ក្នុង​ការ​គ្រប់គ្រង ការ​ប្រើប្រាស់​បច្ចេកវិទ្យា និង​ធនធាន​មនុស្ស​ផ្សេងៗ​គ្នា។ ចំនួន​អង្គការ​ទាំងនេះ​ធ្វើ​ឲ្យ​មាន​កំណើន​អង្គការ​ក្នុង​និង​ក្រៅ​ស្រុក​ដែល​បង្កើត​ឡើង​ដើម្បី​ជួយ​អង្គការ​សង្គម​ស៊ីវិល​ទាំង​នេះ​ធ្វើ​ការងារ​មាន​ប្រសិទ្ធភាព​ជាងមុន។

នៅ​កម្ពុជា អង្គការ​គណៈកម្មាធិការ​សហប្រតិបត្តិការ​ដើម្បី​កម្ពុជា (គសក) ដែល​ជា​សមាគមប្រមូល​ផ្ដុំអង្គការសង្គម​ស៊ីវិល​នានា និង​មាន​ផ្ដល់ជូន​ជា​ការ​បណ្ដុះបណ្ដាល ការ​ស្រាវជ្រាវ និង​ជំនួយ​ផ្នែក​បច្ចេកទេស​ទៅ​កាន់​សមាជិក​ជាង​១៧០​ស្ថាប័ន​របស់​ខ្លួន។ អង្គការ​សង្គម​ស៊ីវិល​នៅ​កម្ពុជា​ទទួល​ជំនួយ​ពី​អ្នក​ផ្ដល់​ជំនួយ មូលនិធិ និង​អង្គការ​មិន​មែន​រដ្ឋាភិបាល​ជា​ច្រើន​ក្នុង​សហគមន៍​អន្តរជាតិ ដែល​រាប់ទាំង​គម្រោង Development Innovations របស់ USAID ផងដែរ។ Development Innovations ជួយ​អង្គការ​សង្គម​ស៊ីវិល​ក្នុងស្រុក ក្រុមហ៊ុន​បច្ចេកវិទ្យា និង​សហគ្រាស​សង្គម ក្នុងការ​បង្កើត​និង​ប្រើប្រាស់​បច្ចេកវិទ្យា​ថ្មីៗ​ដើម្បី​ដោះស្រាយ​បញ្ហា​ប្រឈម​ក្នុងការ​អភិវឌ្ឍន៍​នៅ​កម្ពុជា។


Interviewing the director of a Cambodian CSO for Member Insights.

ការ​សម្ភាសន៍​ជាមួយ​នាយក​អង្គការ​មួយ​រូប​ដោយ​ប្រើ​វិធីសាស្រ្ត​ស្រាវ​ជ្រាវ​ស៊ីជំរៅ


កាល​ពី​ខែ​ឧសភា ខ្ញុំ​បាន​ទៅ​ទីក្រុង​ភ្នំពេញ​ដើម្បី​ធ្វើការ​ជាមួយ គសក និង DI ក្នុង​ស្វែង​យល់​បន្ថែម​អំពី​វិធីសាស្រ្ត​ដែល​អង្គការ​សង្គម​ស៊ីវិល​កម្ពុជា​ប្រើ​បច្ចេកវិទ្យា​ដោយ​ប្រើ​វិធីសាស្រ្ត​ស្រាវជ្រាវ​ស៊ីជំរៅ (Member Insights)។ តើ​អ្វី​ទៅ​ជា Member Insights? វា​ជា​ប្រភេទ​ស្រាវជ្រាវ​មួយ​ស៊ីជំរៅ​ដែល​ផ្ដោត​សំខាន់​ទៅ​លើ​អង្គការ​សង្គម​ស៊ីវិល​ជា​សមាជិក​ក្នុង​បណ្ដាញ​របស់ គសក។ វា​គឺ​ជា​វិធីសាស្ត្រ​ស្រាវជ្រាវ​ដែល​លឿន​និង​ត្រូវ​ចំណាយ​តិច បង្កើត​ឡើង​ដើម្បី​បន្លិច​ពី​របៀប​អង្គការ​នីមួយៗ​ប្រើប្រាស់​បច្ចេកវិទ្យា​និង​វិធីសាស្ត្រ​ទំនាក់ទំនង ដោយ​ផ្តោត​សំខាន់​ទៅ​លើ​ឧបករណ៏​ពេញនិយម​ដែល​អង្គការ​ប្រើ​​សម្រាប់​ចែក​រំលែក​ព័ត៌មាន​ក្នុង​ស្ថាប័ន និង​របៀប​ដែល​អង្គការ​ទាំង​នោះ​ទាក់ទង​ជាមួយ​នឹង​ក្រុម​គោលដៅ​របស់​ពួកគាត់។ ក្នុង​ករណី​នេះ ទោះបី​ជា​ការ​ផ្ដោត​សំខាន់​គឺ​ទៅ​លើ​អង្គការ​សង្គម​ស៊ីវិល វិធីសាស្រ្ត​នេះ​ក៏​អាច​ប្រើប្រាស់​បាន​ទៅ​លើ​អាជីវកម្ម អង្គភាព​រដ្ឋាភិបាល និង​គ្រួសារ។ ទាំងនេះ​ជា​អ្វី​ដែល​ខ្ញុំ​បាន​រក​ឃើញ៖

 

#1 Facebook Messenger គឺ​ជា​ឧបករណ៏​សម្រាប់​ទាក់ទង​ជាមួយ​មិត្តភ័ក្ដិ​និង​អ្នក​រួម​ការងារ

បុគ្គលិក​ទាំង ៤៨​នាក់ ដែល​មក​ពី​អង្គការ​សង្គម​ស៊ីវិល​ចំនួន​២០​ផ្សេង​គ្នា​សុទ្ធ​តែ​មាន Facebook Messenger នៅ​ក្នុង​ទូរស័ព្ទ​របស់​ពួក​គាត់។ ចំណែក​ឯ​កម្មវិធី​ផ្ញើសារ Skype និង Line មាន​ប្រជាប្រិយភាព​គ្រាន់បើ ផ្ទុយ​ពី Whatsapp ដែល​មិន​សូវ​មាន​ការ​ពេញ​និយម។

 

 

បើ​ទោះ​ជា​មាន​កម្មវិធី​ក្នុង​ទូរស័ព្ទ​ក៏​ដោយ អ្នក​ប្រើ​មិន​ប្រាកដ​ថា​នឹង​ប្រើ​គ្រប់​កម្មវិធី​នោះ​ទេ។ ពួក​ខ្ញុំ​បាន​សួរ​អ្នក​​ទាំងនោះ​ពី​ចំនួន​សារ​ដែល​ពួក​គាត់​ផ្ញើ​ចេញ​តាម​កម្មវិធី​នីមួយៗ​ប្រចាំ​ថ្ងៃ។ ហើយ​ចម្លើយ​បាន​ឲ្យ​ឃើញ​ថា​ពូកគាត់​ផ្ញើ​ចេញ​មិន​តិច​ជាង ១៥​សារ នោះ​ទេ​ក្នុង​មួយ​ថ្ងៃៗ​តាម​រយៈ Facebook Messenger។

 

 

ពួក​ខ្ញុំ​ក៏​បាន​សួរ​អ្នក​ទាំងនេះ​ពីកម្មវិធី​ផ្ញើសារ​ដែល​ពួក​គាត់​ប្រើ​សំរាប់​ទំនាក់ទំនង​គ្នា​ក្រៅ​ផ្លូវ​ការ ហើយ​ក្នុង​ចំណោម​២០​នាក់​មាន ១៦​នាក់​បាន​និយាយ​ថា​ពួកគាត់​ប្រើ Facebook Messenger។ ហើយ Skype ជា​ជំរើស​ទី​២ ដោយសារ​​តែ​​ការ​​ដំឡើង​​ថ្មី​ធ្វើ​ឲ្យ​ការ​ផ្ញើសារ​មាន​ភាព​ងាយស្រួល​ជាង​មុន។

 

 

#2 Facebook ជា​ឧបករណ៍​ចម្បង​សម្រាប់​ទាក់ទង​ទៅ​ក្រុម​គោលដៅ​របស់​ពួក​គាត់

 

អង្គការ​ទាំង​២០​នេះ​សុទ្ធ​តែ​មាន​គេហទំព័រ​រៀងៗ​ខ្លួន ប៉ុន្តែ​មាន​តែ 90% ប៉ុណ្ណោះ​ដែល​មាន​ទំព័រ Facebook របស់​ខ្លួន។ ក្រៅ​ពី​នេះ​ពួក​គាត់​ដាក់​បញ្ចូល​ព័ត៌មាន​ផ្សេងៗ​ក្នុង Facebook ច្រើន​ជាង​ក្នុង​គេហទំព័រ។ អង្គការ​ភាគ​ច្រើន​និយាយ​ថា​ពួកគាត់​បញ្ចូល​ព័ត៌មាន Facebook ជា​រៀងរាល់​សប្ដាហ៏​ឬ​រាល់​ថ្ងៃ ហើយ​បង្ហោះ​ចូល​គេហទំព័រ​យូរៗ​ម្ដង​ឬ​តាម​ត្រីមាស​ប៉ុណ្ណោះ។

 

 

ពួក​យើង​​ក៏​បាន​សួរ​ពី​អ្នក​ដែល​មាន​តួរ​នាទី​ដាក់​បញ្ចូល​ព័ត៌មាន​ទាំង​នោះ និង​ពី​ពេល​ដែល​គាត់​បង្ហោះ​វា។ ចម្លើយ​គឺ​ព័ត៌មាន​ទាំងនោះ​ត្រូវ​បាន​បង្ហោះ​ដោយ នាយក​អង្គការ ក៏​ប៉ុន្តែ​ជា​ធម្មតា​ក៏​មាន​បុគ្គលិក​ផ្នែក​ព័ត៌មានវិទ្យា​និង​រដ្ឋបាល​ចូល​រួម​ចំណែក​ផង​ដែរ​។ វា​គួរ​ឲ្យភ្ញាក់ផ្អើល​នៅ​ពេល​ដែល​១៥%​នៃ​អង្គការ​ទាំងនោះ​បាន​ឲ្យ​បុគ្គលិក​ផ្នែកទំនាក់ទំនង​របស់​គាត់​ធ្វើ​ការងារ​ទាំង​នេះ។

 

 

#3 បច្ចេកវិទ្យា​សម្រាប់​ប្រតិបត្តិការ​មាន​ភាព​សាមញ្ញ

 
អង្គការ​សង្គម​ស៊ីវិល​កម្ពុជា​ដែល​យើង​បាន​សំភាសន៏ ពួកគាត់​ប្រើ​ឧបករណ៍​បច្ចេកវិទ្យា​សាមញ្ញ​ក្នុងការ​បំពេញ​ការងារ​របស់​ពួកគាត់។ ៨០% ​បាន​ប្រើ​កម្មវិធី QuickBooks សំរាប់​ផ្នែក​គណនេយ្យ​របស់​ពួកគាត់។ ៧០% ប្រើ Outlook សម្រាប់​សារ​អេឡិចត្រូនិក និង​អ្នក​ដទៃ​ទៀត​ប្រើ​សារ​ឯកជន​ឬ​ក៏ Gmail។ ៨០% នៃ​បុគ្គលិក​និយាយ​ថា​ពួក​គាត់​ប្រើ Excel ក្នុងការ​គ្រប់គ្រង​ទិន្នន័យ​អ្នក​ទទួល​ផល​របស់​ពួក​គាត់ ជៀស​ជាង​ប្រើប្រាស់​កម្មវិធី​គ្រប់គ្រង​ទំនាក់ទំនង​ភ្ញៀវ​ផ្ទាល់​ខ្លួន​ដូចជា Salesforce, CiviCRM, និង Hubspot។ តួលេខ​ដដែល ៨០%​និយាយ​ថា​គាត់​ប្រើ​ក្រដាស​ក្នុងការ​ប្រមូល​ទិន្នន័យ ផ្ទុយ​ពី​របៀប​ប្រមូល​ទិន្នន័យ​ដោយ​ឌីជីថល។

 

 

នា​ថ្ងៃ​ខាង​មុខ​ទៀត ខ្ញុំ​នឹង​ធ្វើការ​ជាមួយ​នឹង DI និង គសក ក្នុងការ​យក​ទិន្នន័យ​ពី​ការ​ស្រាវជ្រាវ​នេះ​ទៅ​បង្កើត​កម្មវិធី​បណ្ដុះបណ្ដាល​ថ្មី​និង​សមស្រប ដើម្បី​ការ​ផ្សព្វផ្សាយ​ឲ្យ​កាន់​តែ​ល្អ​សំរាប់​សមាជិក គសក។

សូម​ទស្សនា​វីដេអូ​ខាង​ក្រោម​ដើម្បី​ស្វែង​យល់​បន្ថែម​ពី​អ្វី​ទៅ​ជា​វិធីសាស្រ្ត​ស្រាវ​ជ្រាវ​ស៊ីជំរៅ (Member Insights)
 

Share this post...
Share on Facebook
Facebook
0Tweet about this on Twitter
Twitter
Email this to someone
email