សារ​សំខាន់​ទាំង​ប្រាំបី​ពី​ការ​ស្ទង់​មតិ​របស់​អង្គការ​ជនពិការ​កម្ពុជា

អត្ថបទ​នេះមានជាភាសា៖ enEnglish

Krisna

ដោយ លោក កែវ គ្រឹស្នា

អតីត​អ្នក​គ្រប់គ្រង​គំរោង ICT4D
Development Innovations


 

នៅពាក់កណ្ដាលឆ្នាំ២០១៧នេះ អង្គការ​ជនពិការ​កម្ពុជា បាន​ចេញ​ផ្សាយ​ពី​លទ្ធផល​ដែល​បាន​រក​ឃើញ​អំពី​ជន​ពិការ​ជា​សមាជិក​និង​មិនមែន​ជា​សមាជិក​របស់​ខ្លួន។ ការ​ស្រង់​មតិ​នេះ​ផ្តោត​សំខាន់​ក្នុងការ​យល់ដឹង​បន្ថែម​ពី​វិធីសាស្រ្ត​ដែល​ដៃគូ​របស់​អង្គការ​ធ្វើការ​ទំនាក់ទំនង ទទួល​ព័ត៌មាន និង​ប្រើប្រាស់​បច្ចេកវិទ្យា។ ការ​ស្រាវជ្រាវ​នេះ​បាន​​សិក្សា​​ទៅ​លើ​ជនពិការ​ចំនួន ១០០​នាក់​ដែល​ជា​សមាជិក​និង មិនមែន​ជា​សមាជិក​របស់​អង្គការ ដើម្បី​ទទួល​បាន​ទិន្នន័យ​ក្នុងការ​រចនា​បង្កើត​ដំណោះ​ស្រាយ​ឲ្យ​កាន់តែ​មាន​ប្រសិទ្ធិភាព​ទៅ​ដល់​ក្រុម​គោលដៅ​របស់​ខ្លួន​ដែល​កំពុង​រស់​នៅ​ក្នុង​ខេត្ត​ទាំង ២៥ និង​រាជធានី​ភ្នំពេញ នៃ​ប្រទេស​កម្ពុជា។ បច្ចុប្បន្ន​នេះ អង្គការ​ជនពិការ​កម្ពុជា​មាន​សមាជិក​ដែល​ជា​ជនពិការ​ចំនួន ១៦១៤៥​នាក់​ដែល​កំពុង​រស់​នៅ​ទូទាំង​ប្រទេស​កម្ពុជា។

ការ​សិក្សា​ស្វែង​យល់​​ពី​​វិធីសាស្រ្ត​​ដែល​​មនុស្ស​​ប្រើប្រាស់​​បច្ចេកវិទ្យា​​ព័ត៌មាន​និង​គមនាគមន៏ និង​គាំទ្រ​ដៃគូ​របស់​យើង​ក្នុងការ​ស្រាវជ្រាវ​ពី​អ្នក​ប្រើប្រាស់ គឺ​ជា​មួយផ្នែកនៃការងាររបស់គម្រោង Development Innovations។ អង្គការ​ជនពិការ​កម្ពុជា​បាន​និង​កំពុង​ធ្វើការ​ជាមួយ​នឹង​បណ្ដាញ​ជនពិការ​ផ្សេងៗ​ដូចជា ថ្លង់ ពិការ​ភ្នែក ឱនភាព​កាយ​សម្បទាន ភាព​បញ្ញា។ល។ អង្គការ​ជនពិការ​មាន​កម្មវិធី​ល្អៗ​សំរាប់​ជួយ​សហគមន៏​នេះ ប៉ុន្ដែ​មិន​មាន​ទិន្នន័យ​អំពី​ការ​ប្រើប្រាស់​បច្ចេកវិទ្យា​របស់​ពួកគាត់​នៅ​ឡើយ​នោះ​ទេ។ ការ​យល់ដឹង​ពីការ​ទទួល​ព័ត៌មាន ទំនាក់ទំនង និង​ប្រើប្រាស់​បច្ចេកវិទ្យា​របស់​ជនពិការ​ពិត​ជា​មាន​សារៈសំខាន់​ណាស់​ក្នុងការ​បង្កើត​កម្មវិធីថ្មី។ ទិន្នន័យ​ទាំង​នេះ​ត្រូវ​បាន​គេ​ហៅ​ថា​ការ​ស្រាវជ្រាវ​អំពី​អ្នក​ប្រើប្រាស់​ឬការ​ស្រាវជ្រាវ​ដើម្បី​បង្កើត និង​ជា​វិធី​មួយ​ក្នុងការ​ប្រមូល​ផ្ដុំ​ព័ត៌មាន​អំពី​ក្រុម​គោលដៅ​ណា​មួយ​ដែល​លឿន​និង​ចំណាយ​ធនធាន​តិច(សូម​ចង​ចាំ​ថា​នេះ​មិន​សំដៅ​ទៅ​លើ​ស្ថិតិ​ថ្នាក់​ជាតិ​នោះ​ទេ)។ នៅ​ពេល​ដែល​យើង​ទទួល​បាន​ទិន្នន័យ ខ្ញុំ​បាន​ឃើញ​ចំនុច​គួរ​ឲ្យ​ចាប់​អារម្មណ៏​ចំនួន​៨​ដែល​គួរ​ចែក​រំលែក​ប្រសិន​បើ​អ្នក​មិនមាន​ពេល​គ្រប់គ្រាន់​ក្នុងការ​អាន​របាយការណ៏​ពេញលេញ។

  1. ករណី​ភាគ​ច្រើន​នៃ​ពិការ​ភាព​គឺ​ការ​ធ្វើ​ចលនា
    ការ​ពិបាក​ក្នុងការ​ធ្វើ​ចលនា​គឺ​ជា​ពិការភាព​ដែល​មាន​ចំនួន​ច្រើន។ អ្នក​ចូល​រួម​ចំនួន ៧៧.៣% បាន​ទទួល​ផល​ប៉ះពាល់​ពី​បញ្ហា​នេះ។ ៩.៣% មាន​ភាព​ពិបាក​ក្នុងការ​មើល ៧.២%​មាន​ភាព​ពិបាក​ក្នុងការ​ស្ដាប់ ៤%​មាន​ភាព​ពិបាក​ក្នុង​ការ​គិត និង​មួយ​ចំនួន​តូច​ទៀត​មាន​ការ​ពិបាក​ក្នុងការ​និយាយ។

    រូបទី១ ប្រភេទ​ពិការភាព​ដែល​អ្នក​ចូលរួម​ជួប​ប្រទះ
  2. ក្រៅពី​ពិការភាព អ្នក​ចូលរួម​ភាគ​ច្រើន​បាន​ចូល​រៀន​ឧត្តមសិក្សា
    ទោះបី​ជា​ជនពិការ​ត្រូវ​បាន​គេ​រាប់​ចូល​ជាក្រុម​ដែល​ពិបាក​ក្នុងការ​ទទួល​បាន​ការ​អប់រំ វាពិតជាគួរ​ឲ្យ​កោត​សសើរ​មែនទែន ដែល​អ្នក​ចូលរួម​ភាគ​ច្រើន​ជា​ពិសេស​សមាជិក​អង្គការ​ជនពិការ​កម្ពុជា​ទទួល​បាន​ការ​អប់រំ​ក្នុង​កំរិត​ល្អមួយ។ ច្រើន​ជាង​ពាក់​កណ្ដាល(៥៣.៦%)រៀន​បាន​ដល់​មហាវិទ្យាល័យ ១២.៤%​បាន​រៀន​ដល់​វិទ្យាល័យ​ថ្នាក់ទី​១០​ដល់​ទី១២ ១៤.៤%​រៀន​ដល់​អនុវិទ្យាល័យ​ថ្នាក់​ទី​៧ ដល់​ថ្នាក់​ទី​៩ និង​ប្រហែល​២០%​បាន​រៀន​ដល់​ថ្នាក់​បឋម​សិក្សា។
  3. ជនពិការ​ជា​ច្រើន​មិនបាន​ដឹង​ពី​សិទ្ឋិ​របស់​ពួកគេ
    មួយភាគធំនៃអ្នកចូលរួម(៦៣%)មិនបានដឹងអ្វីសោះពី អនុសញ្ញា​អង្គការ​សហប្រជាជាតិ​ស្ដី​ពី​សិទ្ធិ​ជន​ពិការ។ មាន​តែ ១៤.៤% ប៉ុណ្ណោះ​ដែល​បាន​លឺ​ពី​អនុសញ្ញា​នេះ។ ប៉ុន្តែ ៣.៥% នៃ​អ្នក​ចូល​រួម​បាន​ដឹង​សព្វ​ពីអនុសញ្ញា​នេះ និង​មិន​មាន​ចំណាប់​អារម្មណ៏​ក្នុងការ​ដឹង​បន្ថែម។ ៧៧.៤% នៃ​អ្នក​ចូលរួម​ដែល​មិន​បាន​ដឹង​ពី​អនុសញ្ញា​នេះ មាន​ចំណាប់​អារម្មណ៏​យល់ដឹង​បន្ថែម​ពី​អនុសញ្ញា​នេះ។
  4. ពួក​គាត់​ភាគ​ច្រើន​ដឹង​ពី​ច្បាប់​ស្តីពី​ការ​ការពារ​និង​លើក​កម្ពស់​សិទ្ធិ​ជន​ពិការ​របស់​កម្ពុជា
    ៦២%​នៃ​អ្នក​ចូលរួម​បាន​ដឹង​ខ្លះ​អំពី​ច្បាប់​ជាតិ​នេះ និង​៩.៣% ដទៃ​ទៀត​ដឹង​សព្វ​អំពី​ច្បាប់​នេះ​និង​មិន​ត្រូវការ​ព័ត៌មាន​បន្ថែម។ ២២.៧%​មិន​បាន​ស្គាល់​ពី​ច្បាប់​នេះ​ទាល់​តែ​សោះ។ ៨៥%​នៃ​អ្នក​ចូលរួម​ទាំងអស់ ទាំង​អ្នក​ចេះ​ស្រាប់​និង​អ្នក​មិន​ចេះ ចង់​យល់​ដឹង​ពី​ច្បាប់​នេះ​បន្ថែម។
  5. ទូរទស្សន៏ អ៊ីនធើណែត និង​ស្មាតហ្វូន​គី​ជា​មធ្យោបាយ​​ល្អ​បំផុត​ក្នុងការ​ទំនាក់ទំនង​របស់​ជនពិការ
    អ្នក​ចូលរួម​ចំនួន ៨៧.៦% មាន​ទូរទស្សន៏​ជា​បណ្តញា​ទំនាក់ទំនង​ផ្តល់​ព័ត៌មាន​ចម្បង​មួយ​ដែល​ពួក​គាត់​ប្រើប្រាស់ ខណៈពេល​ដែល​វិទ្យុ​ឈរ​នៅលំដាប់​បន្ទាប់​មាន​ចំនួន​៧២%។ គួរ​ឲ្យ​រំភើប​មែន​ទែន​នៅ​ពេល​ដែល​ចំនួន​ជនពិការ​ប្រើប្រាស់​ស្មាតហ្វូន​ដែល​មាន​អ៊ីនធើណែត​មាន​ដល់​ទៅ ៦១.៥% និង​ចំនួន​ជនពិការ​ប្រើប្រាស់​ទូរស័ព្ទ​ធម្មតា​មាន​ចំនួន ៦១%។ អ្នក​ចូលរួម​ដែល​មាន​កុំព្យូរទ័រ​មាន​តែ ១៧%ប៉ុំណ្ណោះ។

    រូបទី២ ការ​ប្រើប្រាស់​និង​ភាព​ជា​កម្មសិទ្ធ​របស់​ឧបករណ៏​គមនាគមន៏
  6. ជនពិការ​មាន​ចំណាប់​អារម្មណ៏​យល់ដឹង​បន្ថែម​ពី​សិទ្ឋិ​របស់​ពួកគេ
    អ្នក​ចូលរួម​ចំនួន ៨៦.៦% ចង់​ដឹង​ពី​ព័ត៌មាន​ទាក់ទង​នឹង​សិទ្ឋិ​ទទួល​បាន​ព័ត៌មាន ៨៤.៦% ចង់​ដឹង​ពី​ព័ត៌មាន​ទាក់ទង​នឹង​ច្បាប់​ការពារ​និង​លើក​កម្ពស់​ជន​ពិការ ៨៤.៥%​ចង់​ដឹង​ពី​ព័ត៌មាន​ទាក់ទង​នឹង​សិទ្ឋិ​ទទួល​បាន​ការ​ថែទាំ​សុខភាព ៨៣.៥%​ចង់​ដឹង​ពី​ព័ត៌មាន​ទាក់ទង​នឹង​សិទ្ឋិ​ក្នុងការ​បញ្ចេញ​មតិ ៨២.៥%​ចង់ដឹង​ពី​ព័ត៌មាន​ទាក់ទង​នឹង​សិទ្ធិ​ទទួល​បាន​ការ​អប់រំ ៨២.៤%​ចង់​ដឹង​ពី​ព័ត៌មាន​ទាក់ទង​នឹង​សិទ្ឋិ​ក្នុងការ​ចូល​ប្រើ​អាគារ និង​៧៨.៤%​ចង់​ដឹង​ពី​ព័ត៌មាន​ទាក់ទង​នឹង​សិទ្ឋិ​ចូលរួម​ការ​បោះឆ្នោត។ លើស​ពី​នេះ អ្នក​ចូល​រួម៧៨.៣%​ក៏​ចង់​ដឹង​ពី​ព័ត៌មាន​ទាក់ទង​នឹង​អត្តសញ្ញាណ​ប័ណ្ណ​ឬ​សៀវភៅ​គ្រួសារ និង​៧៦.៣%​ចង់​ដឹង​ពី​ព័ត៌មាន​ទាក់ទង​នឹង​កញ្ចប់​សង្គម។

    រូបទី៣ ប្រភេទ​ព័ត៌មាន​ដែល​អ្នក​ចូលរួម​ចង់​ដឹង​បន្ថែម
  7. មិនមាន​ការ​ឯកភាព​លើ​មធ្យោបាយ​ទំនាក់ទំនង​រួម
    វាគួរ​ឱ្យ​ភ្ញាក់​ផ្អើល​សំរាប់​ភាព​ចម្រុះ​នៃ​របៀប​ទំនាក់ទំនង​ដែល​អ្នក​ចូលរួម​និយម​ប្រើ។ ការ​សន្ទនា​ផ្ទាល់មាត់​គឺ​ជា​មធ្យោបាយ​ដែល​គេ​និយម​ជាង​គេ​សំរាប់​ទទួល​បាន​ព័ត៌មាន​អំពី​ពិការ​ភាព(២៥.២%) ចំណែក​ឯ YouTube មាន​តែ​៣.២%​ប៉ុណ្ណោះ។ ១៩% និយម​ប្រើ​វិទ្យុ​ឬ​កាសែត ១៨.២%​និយម​ប្រើ​ទូរទស្សន៏ និង ១៥.៤%​និយម​ប្រើ​ហ្វេសប៊ុក ដើម្បី​ទទួល​បាន​ព័ត៏មាន​ទាក់ទង។

    រូប​ទី​៤ ប្រភេទ​ទំនាក់ទំនង​ដែល​អ្នក​ចូល​រួម​ពេញ​ចិត្ត​
  8. ពេល​ណា​ក៏​ជា​ពេល​សំខាន់​សំរាប់​ទទួល​ព័ត៌មាន
    វា​ពិតជា​គួរ​ឲ្យ​ចាប់​អារម្មណ៏​ដែល​អ្នក​ចូលរួម​ភាគ​ច្រើន (៦៦% ដល់ ៦៨%) អាច​ទទួល​បាន​ព័ត៌មាន​គ្រប់​ពេល​វេលា​តាម​រយៈ​ប្រព័ន្ធ​ទំនាក់​ទំនង​ទាំង​នេះ។ មិន​មាន​ពេល​ណា​មួយ​ដែល​ជន​ពិការ​ទាំងនេះ​មិន​អាច​ទាក់​ទង​បាន​នោះ​ទេ។

 
នៅ​គម្រោង Development Innovations យើងខ្ញុំ​គិត​ថា​ការ​ស្វែង​យល់​ពី​ទំលាប់ ចំណេះដឹង និង​គំលាត​បច្ចេកវិទ្យា​នៃ​ក្រុម​ទិសដៅ​និង​អ្នក​ទទួលផល​សំរាប់​ការ​បង្កើត​ដំណោះ​ស្រាយ​នានា​ពិត​ជា​មាន​សារៈ​សំខាន់​មែនទែន។ ការ​ស្រាវជ្រាវ​ខាង​លើ​មាន​សារៈប្រយោជន៍​សំរាប់​អង្គការ​ជន​ពិការ​កម្ពុជា ពីព្រោះ​ទិន្នន័យ​ទាំងនេះ​បាន​ជួយ​ពួកគាត់​ក្នុងការ​យល់​ដឹង​ពី​ក្រុម​គោលដៅ និង​បាន​ផ្ដល់​ព័ត៌មាន​សំរាប់​​ដំណោះស្រាយ​ជំនួយ​នានា​ឲ្យ​កាន់​តែ​មាន​ប្រសិទ្ឋិភាព។ ប្រសិន​បើ​ស្ថាប័ន​របស់​អ្នក​កំពុងតែ​ធ្វើការ​ជាមួយ​នឹង​ជន​ពិការ ការ​ស្រាវជ្រាវ​ទាំងនេះ​អាច​នឹង​ផ្ដល់ការ​យល់ដឹង​ទូទៅ​មួយ​ប៉ុណ្ណោះ អ្នក​អាច​ធ្វើការ​ស្រាវជ្រាវ​ស៊ីជំរៅ​ជាមួយ​នឹង​ក្រុម​គោលដៅ​របស់​អ្នក​ដើម្បី​យល់ដឹង​បន្ថែម​ទៀត​ពី​ពួកគាត់។

Share this post...
Share on Facebook
Facebook
0Tweet about this on Twitter
Twitter
Email this to someone
email